يواصل الدكتور أحمد الشربيني كتابة أشعاره وخواطره التي ننشرها تحت عنوان”شربينيات”،وهذه المرة عن أهمية الكلمة.
إتكَلِّم من غير ما تخاف
خَللي الكِلمة غطاك وغموسك
خللي طيور الفجر تبوسك
ده أنت مراكبي في مركب عايمه
و كلامك هو المجداف
إتكلم من غير ما تخاف
إتكلم .. دي الكلمة سلاح
طير أخضر له ألف جناح
يفرِش سِكّة بكره معاني
يطرح فجر العمر أماني
إتكلم .. و إبدُرها سنابل
مهما في سِكّة بكره نقابل
بكره أنا حأفرح بَك و إفرَح بي
دي الكلمة في البدء يا صاحبي
خَلّت كل إللي ما بيشوفشي
فَتَّح .. و يَّا الفَجر و شاف
إتكلم من غير ما تخاف
د.أحمد الشربيني
أستاذ بكلية الهندسة جامعة القاهرة
