سحر حلمى تكشف أسرار حياة ” أم ترتر”

من هى ام ترتر ؟ سيدة كانت تسكن فى حوارى كرموز، ومعروف عنها أنها ست لسانها طويل ومفترية، وفى فرش الملاية مالهاش مثيل، وماشية على مبدأ فى الحارة الشرشوحة ست جيرانها.
(أم ترتر) مخلفتش ترتر ولا حاجه كان عندها إسماعيل وإبراهيم، ونبوية، .. “ترتر” اسم شهرة لأنها كانت عايقة بتلبس جلاليب ومنديل بترتر، عشان كدا سموها ( أم ترتر) وجوزها المعلم علوان أبو إسماعيل (عربجى حنطور).

(أم ترتر) كانت ست بيت شاطرة، ساكنة فى بيت دور واحد، منه بيت وعربخانة لحصان وعربية المعلم علوان، والبيوت اللى حواليها دورين وثلاثة وعاملة فوق السطح مزرعة فراخ وبط وكلهم مافيش ولا ديك ولا دكر بط.. وسايباهم سارحين ع السطح يلاغو فى ديوك ودكورة بط الجيران، وزى ما قالوا «ومن الحب ما قتل حتى فى الفراخ والبط»، ديوك الجيران كانت تطير إلى سطح «أم ترتر» ، الديك  أو دكر البط  اللى يطير على سطح أم ترتر مفقود يا ولدى، وعلى طول يبقى أجدع عشوة للمعلم علوان!!

وكانت خبرة فى إخفاء أثر الديك من ريش وخلافه، واللى كان يضيع لها ديك وتسأل الجيران يردوا عليها بصوت واطى «عند أم ترتر ربنا يعوض عليكى»، عشان أم ترتر لو سمعت تخلى فردة الشبشب أعلى منهم، وطلع المثل الشعبى «عند أم ترتر» يدل على استحالة أنك تلاقى اللى بتدور عليه رغم أنك عارف ومتأكد مين اللى خده!

ومن بط أم ترتر الى طريقه عمل البط بالبرتقال

طريقة عمل البط بالبرتقال.. وجبة فرنسية يعشقها المصريين

طريقة عمل البط بالبرتقال
المكونات:
• بطة كبيرة الحجم ومغسولة جيدا بالدقيق والملح ثم يتم شطفها بالماء.
• كوب من عصير البرتقال.
• ثمرة من البرتقال.
• ملعقة كبيرة من أوراق الريحان المفرومة.
• ملعقة صغيرة من عصير الليمون.
• كوب من عسل النحل الطبيعي.
• كوب من الزبدة.
• ملح حسب الرغبة.
• ملعقة صغيرة من الفلفل الأسود.
• ملعقة صغيرة من الزنجبيل البودرة.

طريقة التحضير:
• يتم الخلط بين كل من الملح والفلفل الأسود والزنجبيل والريحان خلطا جيدا.
• يتم تتبيل البطة بالخليط جيدا وتترك في الثلاجة إلى أن تتشرب التتبيلة.
• يتم تقطيع حبة من البرتقال إلى أرباع، واستخدامها لحشو البطة.
• أضيفي كلا من العسل وعصير البرتقال، والزبدة، وعصير الليمون في وعاء على النار، مع التقليب جيداً.
• يتم وضع البطة في صينية ودهنها بالشراب السابق تحضيره.
• تدخل الصينية الفرن الساخن في درجة حرارة 190 مئوية، وتترك لمدة ساعة تقريباً حتى الحصول على البطة الناضجة من جمع الجوانب.
• تخرج البطة من الفرن، ويتم صب باقي كمية الشراب.
• تقدم وبالهناء والشفاء.