يواصل الدكتور أحمد الشربيني الأستاذ بكلية الهندسة جامعة القاهرة إبداعاته الشعرية،وذلك في الجزء الرابع من سلسلة شربينيات
صباح الخير علي بلدي .. صباح الخير
صباح الخير علي الناس إللي لِسَّه بخير
علي جُندى علي عامِل علي فلاح
مبَدَّر في الطريق صابِح
بيوصِل خَطوِتُه بنجاح
و بيعيش الحياة بضمير …. صباح الخير
————
صباح الخير علي فاسَك
بيعزَق في الصباح بَدري
طلِع فَجر السما باسَك
و قال فجرَك سَبَق فَجري
أصيل مهما الزمان يعاديك
و تزرَع ..زَرعِتَك مش ليك
يا فارِش مصر نور أخضَر
أمَل ويَّا العمَل يكبَر
و يطرَح عالبلاد الخير … صباح الخير
————–
صباح الخير علي إيدين عرقانين ناشفين
تروس و يَّا المَكَن دايره
و هُّما و المَكَن دايرين
إيدين عمال صنايعيه .. إيدين بَنّا فواعليّه
إيدين بتدُق ع السِندان
تطَّلَع فَجر للإنسان
إيدين سمرا محَنيَّه
بشَحم من المَكَن و السير .. صباح الخير
—————-
صباح الخير علي طالِب
عليه بُكرَه الأمَل معقود
يحقَق كل أحلامنا
و يقطُف م النجوم عنقود
في مدرَستُه و بكتابُه.. فَتَح للعِلم أبوابُه
و بَشَّر بالنَدي و الخير .. صباح الخير
—————-
صباح الخير علي جُندي
هناك و اقِف بيحمينا
أخوه طالِب و أبوه فلاح
و أهله هُمَّا أهالينا
رفَع راسنا .. ملا كاسنا
و بيحَقق أمانينا
يا جيش دايمآ كريم منصور
صباح الخير علي جبينَك .. صباح النور
الدكتور أحمد الشربيني
أستاذ بكلية الهندسة جامعة القاهرة
