سعيد بفكرة ان حسام حسن اقتنع بضرورة وجود مخطط أحمال في جهازه وان كنت اتحفظ علي اختيار البرازيلي لأنها مش مدرسه من مدارس العمل البدني الوظيفي المتميزه وكمان محدش من البرازيليين فيها مشهود له بالعالميه واستاذ من استاذتها في العالم
وكمان لما تجيب اجنبي بيقبض بالدولار يبقى لازم تجيب حد محصلش والعالم الكروي عارفه وصاحب إنجازات ويحمل درجة الاستاذيه فيها ولازم أغِير علي المهنه لان كل الجهاز مصري ولما وثقنا في (المصري) وقولنا بلاش اجنبي الكابتن حسام( المصري) راح جاب اجنبي ومش عاجبه (المصري)
حاجه غريبه ان الجهاز كله اول سنه (مصري) الا العمل البدني اجنبي مع اننا في الأصل لو هنجيب اجنبي محتاجين نلعب كوره لاننا مبنلعبش اصلا ولا نعرف عن الكوره اللي في العالم التاني حاجه خالص
يبقى نجيب حد يعلمنا الكوره وبعدين لما نلعب كوره ونبقى وحشين بدنيا يبقي نجيب اجنبي للبدني
انما كالعاده في المحروسه المنطق وعكسه
حابب اقول حاجه
الفقير إلى الله مخطط أحمال لقطاع الكوره في نادي (انبي) وده تقريبا افضل قطاع كوره في مصر يعني مش خالي شغل والفريق الوحيد في الوطن العربي اللي قائمة فريقه الأول 17لاعب من قطاع الناشئين فيه وبضاعته الكرويه تتهافت عليها كل الانديه
وانا مش ضد الأجنبي انما لو هنجيب نجيب اسماء كبيره تصنع الفارق
وَلما نجيب اجنبي ميبقاش بدني يا كابتن حسام لان البدني النهارده مركب فني وخططي وايش تعمل الماشطه في الوش العكر
وعموما حق أصيل للمدرب اختيار جهازه زي ما هو حقي اني انتصر لكل مخطط أحمال مصري وطني اتحرم عن طريق حسام حسن وأخوه من اللي هما اتحرموا منه زمان وكانوا يبكو الدموع عليه لدرجة ان كل الناس في مصر بالتعاطف قالك اديهم فرصه ومش هنبقي أسوأ من كده معاهم مش لاننا هنبقي افضل معاهم
بالمناسبه نسيت اقولكم ان الاتحاد المصري قد لغي منصب مدير الكوره بس المدير الفني الجديد مبيشتغلش من غير اخوه قام مقطع القرار ما هو حسام مش جاي من غير ابراهيم
ولما تراجع رواتبهم تلاقي العجب العجاب
اخوه اللي هو جابه لانه مبيمشيش من غيره يتقاضي راتب اكبر من باقي الجهاز المعاون كله
وعموما خير انه اقتنع بضرورة وجوده ايا ما كان لان الاعور احسن من الأعمى
والكوره علم مش هنتعمله
