المحله هبط لانه ببساطه معرفش يجيب 7بنط من 51
يعني كارثه ولازم يتحاسب المسؤول عنها
لأنك لو درست نقاطك ال27في الدور الأول وكمان درست احتياجاتك في الدور الثاني للبقاء كان ممكن بسهوله جدا تفضل في الممتاز
علشان كده بنقول للناس والمدربين والقائمين علي العمل وأهل الاختصاص في حاجه اسمها التحليل الوظيفي والمعدلات والإحصاء والمركبات ومورفولجي كرة القدم اللي مينفعش معاه كل حاجه في اي وقت
لما نقول للناس الكوره علم ولازم نتعلمه محدش يزعل لأنها فعلا علم
ووالله ببساطه جدا زعيم الفلاحين اللي انا منهم كان يقعد متربع كمان في الدوري الممتاز
اللي اهم من انك تجيب 27 نقطه في الدور الأول انك تحافظ عليهم في الدور الثاني وده مش هيحصل الا بالتحليل الوظيفي وحساب الأرقام وعلاج الخلل
اللي اهم من انك تجيب مدير فني شاطر انك تجيب فريق تحليل شاطر يشتغل على احتياجاتك طبقا لقدراتك ويقوم أخطائك ويشير لك عليها
انك تجيب حد مخطط أحمال دارس التدريب الرياضي وعلوم الحركه والاسكوتنج الخاص بيهم علشان الكوره مركب بدني فني مش العكس
تجيبه علشان هو دارس ويعمل فرق معاك ومتلاقيش نفسك قدام حلم ضاع وصعب تاني تحققه
متبقاش بتصرف في كل اتجاه الا الاتجاه العلمي السليم اللي يضمن لك تصحيح الأخطاء والحفاظ على المكتسبات
لو الزمالك امبارح كان معاه فريق تحليل وظيفي شاطر كان لحقه والنتيجه لسه واحد صفر
جوارديولا صاحب الكوره مبيعملش تغييرات الا لما فريق العمل بتاعه يقوله علي مواطن الضعف والخلل خلال المباراه وكمان التدريب
بالعلم وحده تعمل فرق ومن غيره هتلاقي نفسك زي المحله بالظبط افتكرت انك قاعد والدور التاني كله الناس جريت حواليك وانت مش عارف واقف ليه وده نموذج من كتير امثله ممكن نتكلم عنها لولا ضيق المقام والمقال
الكوره علم ولازم نتعلمه
