عار عليكم .. رسالة غاضبة من مواطن لمن يعارضون المصلحة العامة فى قريته

عبر احد المواطنين الذي يدعي احمد شطا عن غضبه الشديد من بعض الذين يحاربون مشروعات الدولة في قريته وكتب منشورا غاضبا علي موقع التواصل الاجتماعي فيس بوك قال فيه

“السلام عليكم حابب اقول كلمتين في موضوع أرض مشروع مجمع المدارس وأوجه رساله بسيطه لأهالينا المعترضين.. طبعاً المشروع هو مصلحه عامه لأهل البلد وزي ما الكل عارف هو مشروع دوله مش مصلحه شخصيه يعني بإذن الله المشروع هيتم حضرتك شئت أم أبيت فكان من باب أولى إنه يكون عن طيب خاطر منك..

انا لا اعرف الأشخاص المعترضه مين والله لكن حابب أقولهم كلمه.. بلدنا ما بيتنسيش فيها لا الصالح ولا الطالح والأجيال بتسلم بعضها تاريخ كل شخص يعني على وجه المثال انا لم اعايش الفتره اللي كان فيها عم الحاج فتحي فوده عليه رحمة الله والمشروعات اللي قدمها وساعد فيها للبلد وبقت واقع ملموس قدامنا كلنا لكن سمعت وحكالي عندها جدي وابويا والناس الطيبه الله يرحمهم زي ما حكولي عن مين اللي سعى في بناء المستشفى ومسجد الشيخ منصور ومين سرق اجهزة المستشفى ومعداته وباعها بأرخص التراب واقصد المستشفى لما كان  فعلا مستشفى  بيتعمل فيه اكبر العمليات الجراحيه مش وحده صحيه متهالكه حاليا..

كل واحد عمل خير في البلد اكيد الناس بتذكره بالخير وبتترحم عليه حاليا وكل واحد كان فاسد وواقف ضد اي مصلحه عامه اكيد العار ملاحق عيلته وأبنائه إلى الان برضو لان التاريخ لا يُنسى زي ما قولت وعندنا امثله كتيره من رجال بلدنا اللي ما زالت بصمتهم إلى الآن موجوده في العمل الخيري العام ربنا يبارك في عمرهم وصحتهم..

والتاريخ سيذكر برضو المجموعه المحترمه ولاد الأصول اللي شغاله حالياً على تطوير بلدنا وجذب أي مشروع والسعي في تنفيذه في أقرب وقت فلهم كل الشكر والإحترام والتقدير والدعم..

في النهايه للتوضيح الأرض ليست ارضك حتى ينازعك أحد فيها وتستنجد بالناس فهي ملك للدوله والغريب ان حضرتك مستأجر بأكتر من الايجار العادي فأنت غير مستفيد يبقى مالوش لازمه تقف في وش مصلحه عامه لان التاريخ برضو وبكررها لا ينسى وهيفضل عار عليك هيلاحقك انت وابنائك والاجيال اللي بعدها اللي هستفيد اصلا من المشروع ده. وادي انت امبارح حاولت تعرقل وكان الرد تاني يوم بالإزاله فيد الحق قويه ويد الباطل ضعيفه ولكم جميعاً كل الشكر والتقدير واتمنى ما اكنش طولت عليكم بس كلمتين كنت حابب افضفض بيهم